The news is by your side.

د بغلان پر امنيه قومندانۍ ننی بريد پاى ته رسېدلى

0

پلخمري (پژواک ١٥ غويى ٩٨): د کورنيو چارو وزارت وايي، د بغلان پر امنيه قومندانۍ بريد پاى ته رسېدلى چې په کې ١٣ پوليس او ٨ وسله وال وژل شوي، ٣٥ پوليس او ٢٠ ملکي ګړي ټپيان شوي دي.

د دې وزارت وياند نصرت رحيمي وايي چې نن غرمه د 12 بجو په شاوخوا کې د وسله والو یوې ډلې چې په جګړه ییزو توکو او ځانمرګو واسکټونو سمبال وو، د بغلان ولایت پر امنیه قومندانۍ یې برید وکړ.

د هغه په وينا، په لومړي سر کې، هغوى یو موټر بم ته د امنیه قومندانۍ ودانۍ ته څېرمه چاودنه ورکړه او ورپسې د قومندانۍ انګړ ته دننه شول.

ده زياته کړې، په دې پېښه کې ١٣ ملي پوليس وژل شوي، ٣٥ پوليس او ٢٠ ملکي وګړي ټپيان شوي دي.

رحيمي وايي، دغه بريد د ٨ بريدګرو په وژل کېدو پاى ته ورسېد.

په بغلان کې د درېمې عامه نظم لوا قومندان ډګروال غلام عباس توکلي هم پژواک خبري اژانس ته وويل جې پر امنيه قومندانۍ ډله ييز بريد د اتو بريدګرو په وژنې پاى ته ورسېد.

د ده په وينا، بريد د هاموې ټانک په واسطه شوى و چې پخوا د طالبانو لاس ته ورغلى و.

ولسمشر اشرف غني ياد بريد په کلکو ټکو غندلى او ويلي چې امنيتي ځواکونه به د هغو کسانو په وړاندې چې زموږ بې ګناه خلک وژني او ټولګټو تاسيساتو ته زيان رسوي، په ټول قوت سره به وجنګېږي.

(Visited 62 times, 1 visits today)
Leave A Reply

Your email address will not be published.