The news is by your side.

ازادي

0

هرڅوک خپل بار به پخپله تر منزل وړي

هیڅوک نه دی مکلف چې بار د بل وړي

د موسی او د عیسی لارې جلا دي

که ګنا ده که ثواب دی هرڅوک خپل وړي

هیڅوک نه څملي د بل سړي لحد کې

هر څوک خپله کارنامه د خپل عمل وړي

خپل عمل د لارې مل او د ژوند مل دی

په عبثه، څوک تقدیر ور سره مل وړي

خپله لاره هر څوک ښه ویني تر نورو

که تیاره وه بیا به لاره کې مشعل وړي

لاره مه نیسه د نورو پخپل لار ځه

ژوندون هر څوک پخپل هوډ او په تکل وړي

هلکان که پګړۍ ول کې کشمالي ږدي

نجونه پریږده چې ګلونه په اوربل وړي

چې رضا، خوښي او مینه سره ګډ، وي

ځوانان پریږده که کاله ته ځان کسل وړي

سترګو جنګ په ازادۍ کې به څه حال وي

چې قید زړونه تش د سترګو په کجل وړي

ملا پریږده غرغړو ته په مسجد کې

 ساقي پریږده چې جامونه تر محفل وړي

که تقدیر او د ملا فتنو ته کښینې

هره ورځ دې لاس تړلي تر اجل وړي

ازادي د بل انسان لورنه، نه ده

دا نعمت انسان له پیله، له ازل وړي

ازادي د مړې او ګونګ ټولنې سا ده

ازادي ټولنه مخته پل په پل وړي

هیڅ بها له ازادۍ نه پورته نشته

لوی دښمن دی دا بها چې څوک په چل وړي

څوک طلا، څوک به الماس وړي په ډالۍ کې

شاعر پریږده که ډالۍ کې خپل غزل وړي

زړه مې مینه کې بایللی له پخوا دی

لا مې مینه زړه، په حال او مستقبل وړي

مرادزی

(Visited 29 times, 1 visits today)

Leave A Reply

Your email address will not be published.