The news is by your side.

جنګونه؛ جهادونه دي، حاجيانو – ملايانو!

0

جنګونه؛ جهادونه دي، حاجيانو – ملايانو!
ورځئ؛ شهادتونه دي، حاجيانو – ملايانو!
پنجاب يې ټکټونه ليډرانو باندې وېشي!
کابل کې جنتونه دي، حاجيانو – ملايانو!
دا ښه ده چې مو هر مانځه ته بېل اودس تازه شي!
په دې کې ثوابونه دي، حاجيانو – ملايانو!
جومات کې طالبان له راکټونو سره ناست دي!
د حورو صفتونه دي، حاجيانو – ملايانو!
پوهېږم په ايات او په حديث به مې کافر کړئ!
زما داسې شعرونه دي، حاجيانو – ملايانو!
دا ځينې خلک سم د شتمنيو بندګان دي!
مړه شوي ضميرونه دي، حاجيانو – ملايانو!
نفلونه او روژې د هر سړي نصيب کې نه شته!
عمرې دي، طوافونه دي، حاجيانو – ملايانو!
د چا مخ ته کتاب دی؛ خو په ټکي خبر نه دی!
د چا مخ ته جامونه دي، حاجيانو – ملايانو؟
ځواب وايي، چې خپل وطن کې وږي – تږي نه وي!
عربو کې سيلونه دي، حاجيانو – ملايانو!

عزت الله ځواب

(Visited 85 times, 1 visits today)

Leave A Reply

Your email address will not be published.