The news is by your side.

عبدالباري جهاني /غزل

0

شپې به تیري د توپان وي ما به یاد کې

ځلېدلی به اسمان وي ما به یاد کې

په ګرېوان کي به مي اوښکي در یادیږي

چي نری نری باران وي ما به یاد کې

له هینداري به تصویر وي تښتېدلی

تر قیامته به هجران وي ما به یاد کې

په پانوس کي به نرۍ لمبه بلیږي

تور بریان به پتنګان وي ما به یاد کې

لمر لوېده به د برکلي نجوني راسي

ورا اخیستی به جوپان وي ما به یاد کې

ناوکۍ به تر شالونو لاندي ژاړي

موسکی زوم به ور روان وي ما به یاد کې

پاڅوي به دي سهار نسیم له خوبه

پر باړخو به دي پېزوان وي مابه یاد کې

زما کیسه به له شهبازه وي لوېدلې

ځوان مطرب به غزل خوان وي ما به یاد کې

نه غزل نه جهاني به وي در پاته

بې مستۍ به دي مغان وي ما به یاد کې.

عبدالباري جهاني

د ۲۰۱۹ کال د مارچ شپږویشتمه، ویرجینیا

(Visited 159 times, 1 visits today)
Leave A Reply

Your email address will not be published.