The news is by your side.

غزل/ عزت الله ځواب

0

ملګرو شور په څه دی؟ کړنګ په څه دی؟
چې دا زمونږ د خلکو جنګ په څه دی؟
اسلام اباد کې اسلام ولې نه شته؟
او کابل بيا په وينو رنګ په څه دی؟
خلک په حسن باندې لولپه شول!
سوی په شمع دا پتنګ په څه دی؟
ډالۍ کولو مې ګل، خوښ دې نه شو!
تا غوندې ښکلی دی، بدرنګ په څه دی؟
د جنرالانو جنازې جيګوي!
پاچا په ملا رامات شو، ړنګ په څه دی؟
لکه د بنګو لېونی يې کړمه!
حيران يم خوږ لکه لونګ په څه دی؟
چې غاړه راکړي، خولګۍ نه راکوي!
د ښار په وړکو مې قلنګ په څه دی؟
د درخو زلفې يې تارونه، نه شول!
د ادم خان د رباب ترنګ په څه دی؟
جينۍ د صبر ونه، هسکه غاړه!
هلک چينار په شانې دنګ په څه دی؟
چې حلواګانې ورته نه رسېږي!
ملا نيولی د خان څنګ په څه دی؟
د ايمل خان په خوا کې ودرېده!
خوشال ولکه کې د اورنګ په څه دی؟
د کلي غېږه د جنت په څېر ده!
خو دا زما زړه په کې تنګ په څه دی؟
زه د ولس په منځ کې لوټ شوم په کې
د پښتنو مالت کې ننګ په څه دی؟
چې عمران خان سره نکاح نه تړي!
نو خليلزاد وهلی لنګ په څه دی؟
ما په رڼا ورځې ليدلی نه و!
جانان مې تور دی، غنمرنګ په څه دی؟
د کتابونو دوکانونه لري!
اوس دا ځواب شاعر ملنګ په څه دی؟

(Visited 23 times, 1 visits today)

Leave A Reply

Your email address will not be published.