The news is by your side.

څراغونه

عبدالهادي هادي

0

یوه ونه، سمندر او ستا یادونه مې یاران دي
نور څه نه شته ، تنهایي او ماښامونه مې یاران دي

له سهاره تر بیګا مې، پر خپل زړه زخمونه شمارم
خپل زخمي زخمي وجود او پرهرونه مې یاران دي

ستا هر لفظ مې را په زړه دی، ستا خندا مې را په یاد شوه
هڅوي مې ژوندانه ته ، ستا لوظونه مې یاران دي

له څپو سره همغاړې، زما چیغې وړي جانانه
د دې پورې سمندر، یاغي موجونه مې یاران دي

خدای خو هسې ته رانه کړې، دعاګانې راسره وې
ملنګان زموږ د کلي، زیارتونه مې یاران دي

هر غزل مې یاره واخله، خپل تصویر دې پکې ګوره
جوړوم دې، ورانوم دې ستا خیالونه مې یاران دي

څوک چې ستوری رانه پوښتي، ستا تصویر ورته ښکاره کړم
ستا د زلفو په شان ښکاري، دا تور غرونه مې یاران دي

مشالونه دي، فردا دی که ټکور دی که نظیف دی
تر رستمه هادي شکر څراغونه مې یاران دي

Leave A Reply

Your email address will not be published.