The news is by your side.

ولې- لنډه کیسه

 لیکوال  محمد خالص ادیب

0

د حامد کرزي پر نړیوال هوایي ډګر مسافر وړونکې الوتکې د وروستي ځل لپاره دوره وکړه، څو شېبې وروسته ترې مسافر راکښته شول، جواد له ځانه سره وویل:

  • اوس به مې خاله  ته کومه بهانه کوم، ورکه ځان غلی نیسم، هېڅ به نه وایم

عایشه راغله، له ستړي مشو وروسته ژر له هوایي ډګره ووتل، په موتر کې کېناستل، څه کم یو ساعت وروسته د ارغندۍ له پلټنې تېر شول، په سړک ګڼه ـ ګوڼه نه وه، په موټر کې چوپه ـ چوتیا وه، د عایشې زړه خبر و؛ خو زړه ته یې نه رسېده چې دایسې پېښه دې شوې وي لکه ماشوم ځان یې غلطاوه، کله به یې د سړک په یوه خوا کې سترګې وخنډلې، کله به یې په بله کې خښې کړې، شاوخوا دښتنې، خړ کورونه او ځای ـ ځای یې شینې کروندې له نظره تېره وې. موټر ورو شو، د کندهار او کابل له پاخه سړکه موټر ورو کښته شو، ورو ـ ورو په نه زړه د کلي خواته وګرځېدل، دولسو ته څو پاتې وې چې عایشه د کلا په دروازه راننوته، زوی یې په مخه ورغی، یو دم یې چیغې کړې، په ژبه یې څاڅکی ـ څاڅکی ونیې راپورته شوې، ترې شاوخوا ولاړو کسانو یې چیغو ته طاقت ونه کړ، هره یوه ځانونه ترې پنا کړل، یوازې زوی یې ورته پاتې شو، مور یې ځان پورته کاوه په ځمکه یې واهه، بیا یې چیغې کړې:

  • په څه شي شو دما سره خو پرون ماسپښین وغږېدا!!!

چا د خبرو جراأت نشوای کولای، نه په چا کې دومره سېکه وه چې ځواب ورکړي، په طبیعت د غم وزرې وغوړېدلې وې، هر چا د څادر او ټکري په پیڅکو د سترګو له جامونو راغړېدلې اوښکې پاکوې، عایشې بیا چیغې کړې:

  • ولې راسره خبرې نه کوئ؟؟؟

په ځمکه ولوېده، په خوله یې سپین ځګه ودرېد، زوی یې د پښو تلې پرې موښلې، لورګانو یې مخ ته ورو ـ ورو یخې اوبه ورشیندې، نږدې یو نیم ساعت بې هوښه وه، وروسته بیا په هوښ راغله، د کوټو له مخې سره ګڼې ښځې ناستې وې، د ټولو په اننګو اوښکو لیکې جوړې کړې وې، له حویلۍ بېرون د مېلمستون له مخې سره، تر څپره لاندې رېژېدلی ګل په چارپایي کې مړاوی پروت و، باڼه یې په یو بل کې پېیلي و، په غاړه یې سرې وینې لیکه جوړه کړې وه، هېڅ یې نه ویل، یوه خبره یې هم نه کوه، بېخي مغروره و، په ابدي هو په ابدي سفر روان و، هېڅ یې د خلکو په چیغو ځان نه پوهاوه.

لمر د جدایي ژیړ څادر په طبیعت غوړولی و، هوا ګردجنه وه، د ډېرو ژړاګانو زړه بوږنوونکو اوازونو د حیواناتو او  نباتاتو څېرې مړاوې کړې وې، ټول ښه پوهېدل چې څه شوي دي؛ خو هېڅوک نه پوهېدل چې ولې شوي وي؟؟؟

د دروازې غنګ شو، مور یې بېرون ته راووته، له شکېدلې ګرېوانه او ببرو ویښتو داسې ښکارېده لکه د زوی په وېر یې چې ښې بدې ورځې کړې وي، د زوی دې جنازې له څنګ سره یې شاوخوا کسان پورته شول، په جنازه ور ولوېده، ته زنه یې ونیوه، خبرې یې ورته پیل کړې:

  • غږ راته وکړه، دومره لنډ عمر وي؟ ته خو پرون راسره وغېږدې، تا خو زه ماته په هرات کې چکرې راکوې. تا خو راته ویل چې زه دا ځل هرات ته درځم، ته ولې یو دم رانه لاړې، غږ راته ووکړه، ولې راته غږ نه کوې؟؟؟

تر څپره لاندې په چهارپایي کې مړاوي ګل هېڅ غږ نه کاوه، د هغه نن په هېچا زړه درد نه کاوه، هغه بدون له کومې خدای پاماني په واقعي او نه بدلدونکي حقیقي سفر روان و، شېبه وروسته یې عایشه یې اولادونو تر اوږو ونیوله، د زوی جنازه یې ترې پورته کړه، روان شول، دې د دېواله بېخي ته تکیه وکړه، منګلې یې له ویښتو ډکې کړې، موټۍ ـ موټۍ سپین او تور ویښته یې وشکول، له ډېرې ژړا او سویو نارو یې غږ ولوېد، سترګو یې تورې حلقې ووهلې، داسې چیغده تاوا چا تر ستوني کلکه ونیوه.

د قبر په غاړه ګڼ کسان راټول شول، له اوږو یې چارپایي کښته کړه، ټولو ژړل، داسې سترګې نه لیدل کېدې چې د اوښکو چینې یې نه بهېدلې؛ خو په کټ کې مړاوی ګل د هېڅ چا په کیسه کې نه و، نن بېغي په مغرورانه انداز په ابدي سفر روان و، په څو کسانو یې ونیو، له کټ څخه یې کښته کړ، د قبر په غاړه یې په هوار څادر ورو کېښود، تر لاندې یې لونګۍ څو ولونه واچوله، مور یې له موټر راکښته شوه، سرتور سر، ببر ویښته، شکېدلی ګرېوان په خلکو راګډه شوه، د وروسته یې نارې کړې:

  • د وروستي ځل لپاره یې وینم خیردیه یو ځل یې راته پرېږدئ چې وروستی دیدن یې وکړم

نږدې راغله، پوښتنه یې ورنه ورکړه:

  • چه شېید کړې، څه ګناه دې کړې ده، څومره لنډ عمر دې و، تا خو ویل چې دا ځل زه هرات ته درځم، چکرونه درکوم، ولاړې؟؟؟

زوی یې تر ولیو یې ونیوه، دا نه راتله، په موټر کې یې کښېناوه، د وروستي دیدن لپاره یې بیا ور وکتل، هغه د ګڼو خلکو په منځ کې د قبر په ژۍ په جانانه او مغرورانه انداز  پروت و، شېبه وروسته یې قبر ته ورټیټ کړ، وروسته یې یو دم غږ شو، خاورې پرې واړوئ، د بېلچو کړنګه ـ کړونک شو، لږ وورسته د خاورو څلی جوړ شو؛ خو هېچا ددې پوښتنو ځواب نه درلود:

  • ولې په کومه ګناه څنګه یې شهید کړ؟؟؟ پای
(Visited 25 times, 1 visits today)

Leave A Reply

Your email address will not be published.