The news is by your side.

د ولسمشر غني ارزښتناکې برنامې

0

اېمل پیاوړی-

ولسمشر غني د افغانستان د ښه راتلونکي لپاره ارزښتناکې طرحې او برنامې لري. هغه غواړي حداقل د افغانستان راتلونکي پنځوس کاله تامین کړي او د نوموړي اساسي برنامې د هیواد راتلونکو سلو کالو ته په کتو پلان شوې دي، د بېلګې په توګه هغوی غواړي چې په افغانستان کې عایداتي منابع زیاتې کړې چې یو له هغو څخه د افغانستان موقعیت دی چې ولسمشر غني له مشقت څخه په یو طلابي فرصت بدل کړ، ځکه افغانستان دوه درې سوه کاله د خپل موقعیت له امله ډېرې سختۍ وګاللې او د ترانزیت له پلوه یوازې پاکستان پورې محدود و، مګر ولسمشر غني دغه انحصار مات کړ.

له دې وروسته به افغانستان د ترانزیت له پلوه یوازې پر پاکستان متکي نه وي، بلکې برعکس به پاکستان افغانستان ته احتیاج وي، ځکه ولسمشر غني د اقینې، چابهار، لاجوردو لار او ګڼ نور هوایي دهلېزونه پرانیستي دي او له دغو ټولو لارو افغانستان له سیمې او نړۍ سره نښلول شوی دی. افغانستان اوس د دغو لارو او بندرونو څخه نه یوازې خپل اموال په اسانه لېږدوي، بلکې پرېمانه عواید هم ترلاسه کوي، ځکه افغانستان د سیمې په څلور لاره بدل شوی دی.

د دې ترڅنګ د اوبو مدیریت ته هم اساسي پام شوی او د دې لپاره اساسي تدابیر نیول شوي دي. د دغو اوبو له مدیریت او بندونو جوړولو سره به له  یوې خوا د افغانستان اوبه مهار شي، له بل پلوه به پرېمانه برېښنا تولید شي او هم به نوې ځمکې ایجاد او تر اوبو لاندې شي چې د هغو له استفادې سره به کرنیز تولیدات او محصولا زیات شي. افغانستان به د نورو له احتیاجه خلاص شي او په دې ډول به افغانستان کرار کرار په خپلو پښو ودرېږي.

د ولسمشر غني نهایي هڅه داده چې افغانستان باید له هر پلوه په خپلو پښو ودرېږي، د پردیو له احتیاجه خلاص شي او له خپلو زېرمو او فرصتونو څخه په اعظمي استفادې د هیواد او راتلونکو نسلونو هوساینه تضمین کړي. نوموړي د هیواد د لنډمهال، منځمهال او اوږدمهال لپاره طرحې او برنامې ترتیب کړي چې ګام پر ګام یې تطبیقوي. په تېرو څلورنیمو کالو کې په دې برخه کې پام وړ پرمخت شوی او ګڼې لاسته راوړنې لري.

جمهوررئیس غني خپلو لنډمهالو، منځمهالو او اوږدمهالو موخو ته د رسېدو لپاره هڅه کوي چې پر هیواد تحمیل شوی جنګ ودروي، ځکه جنګ د وراني او تباهي ترڅنګ د فرصتونو او امکاناتو د ضایع کېدو لامل کېږي. له  همدې امله یې په تېرو څلور نیمو کالو پر سوله تمرکز یات کړ او په دې برخه کې یې هم پام وړ بدلون راوست، ځکه له سولې منکر وسله وال طالبان یې سولې ته وهڅول.

د اسلامي هیوادونو سکوت یې مات کړ، هغوی یې د پرلپسې هڅو په پایله کې دېته تشویق کړل چې د بین المللي کنفرانس له  لارې د افغانستان جنګ نامشروع وګڼي او په پایله کې همداسې وشول، ځکه چې په اندونیزیا او سعودي عربستان کې د اسلامي علماو کنفرانسونو د وسله والو طالبانو جنګ د اسلام حکمونو خلاف او افغان وژنه وباله او هغوی یې سولې ته وهڅول. که په هیواد کې تلپاتې سوله تامین شي، نو باور دی چې د ولسمشر غني ملي برنامې او پلانونه به د هیواد امنیت او ثبات کې پام وړ رول لري.   

(Visited 31 times, 1 visits today)
Leave A Reply

Your email address will not be published.