The news is by your side.

مثبت او منفي خلک څنګه تفکیک کړو؟

ژباړه: ثناءالله فیضي

0

لکه څنګه چې تاسې پوهېږئ، د مثبتو خلکو سره اوسېدل خورا اغېزناکه او متفاوته تجربه ده. که تاسې په دې هڅه کې یئ چې ځان یو مثبت شخص وګرځوئ او همدارنګه مثبت خلک تشخیص کړئ، نو د دې کار له پاره لاندې پینځلس ټکي په پام کې ولرئ:

۱. ناکامي د زدکړې یوه برخه ده.

مثبت خلک، ناکامۍ ته د زدکړې د فرصت په توګه ګوري. دوی پوهېږي چې ناکامي یوه پېښه ده. ناکامېدل دوی ته په دې مانا نه دي چې ګواکې دوی بریالي خلک نه دي. منفي ګرا خلک، په یو ځل ناکامېدو سره ماته خوري او احساسات یې کمزوري کېږي. دوی په دې باور دي چې ناکامي به د تل له پاره د دوی پر شخصیت وتپل شي.

۲. زه سخت کارونه کولای شم.”

د مثبت فکر لرونکي کسان، ننګونو ته خوشحالېږي. دوی پر دې پوهېږي چې له خولو تویولو پرته پرمختګ نه کېږي. مثبت خلک سختیو ته هرکلی وایي او پر هغو د برلاسي کېدو لارې چارې لټوي. منفي خلکو ته تل اسانه لارې خوند ورکوي، دا ځکه چې خنډونه د ناکامۍ چانس ډېروي او دوی په هېڅ صورت ناکامي نه شي زغملای. منفي ګرا خلک په دې باور وي چې سختۍ انسان پیاوړی کوي نه، بلکې له پښو یې غورځوي.

  1. زه تل خپله ټوله هڅه کوم.

که حالات هر ډول وي، مثبت خلک یوازې په خپل زیار او همت متمرکز وي او خپله ټوله هڅه کوي. دوی پوهېږي چې ډېر شیان شته چې انسان یې نه شي کنټرولولای خو دا د انسان په لاس کې ده چې پوره هڅه او هاند وکړي. مثبت خلک په هر ډول حالت کې خپل د توان سره سم زیار باسي او هڅه کوي. منفي خلک تل غواړي چې اسانه کارونه یې مخې ته راشي. دوی که سخت کار کولو ته اړ هم شي، پر خپل ځان باور بایلي او ډېر ژر تسلیمېږي. دوی هغه وخت خپله ټوله هڅه کوي، کله یې چې خلک ویني.

۴. د فلاني کیسه الهام بښونکې ده.

مثبت خلک، د نورو له بریا الهام اخلي، دوی تکړه او بریالي کسان تعقیبوي او له ځانه پوښتي چې “زه له هغوی څخه څه زده کولای شم؟” منفي خلک بیا له نورو سره بخیلي کوي او په بریالي کېدو یې ځان ته خطر احساسوي. دوی د نورو په بریالیتوب کې خپله ناکامي ویني.

۵. زه څنګه لا ښه شم؟

مثبت خلک، د خپل کار پایله او ارزوونه په ورين تندي مني، ځکه دوی تل د بهترېدو په هڅه کې وي. دوی هره نيوکه مني، زدکړه ترې کوي او د خپلو مهارتونو په ښه کولو کې ترې کار اخلي. منفي فکره کسان، نيوکه او انتقاد د ځان سپکاوی ګڼي. د دې پر ځای چې مثبته ګټه ترې واخلي، د خپلې کمروزۍ په مانا یې تعبیروي.

۶. زه چې کوم شي ته ډېره توجه ورکوم، همغه غښتلی کېږي.

مثبت خلک، پر هغه څه ډېر تمرکز کوي چې د دوی په کنټرول کې وي. دوی پوهېږي چې خوښۍ، د پېښو پر وړاندې د غبرګون په څرنګوالي پورې تړلې دي. مثبت فکره اشخاص په دې باور وي چې کوم څه ته چې ډېره توجه ورکړې، هغه نور هم پیاوړي کېږي. منفي خلک، پر هغه شیانو متمرکز وي چې د دوی په لاس کې نه وي. مثلاً: دوی په تېرو خبرو باندې شخوند وهي، د خپلو پخوانیو تېروتنو له امله ځان ملامتوي او د راتلونکې په اړه وېره ورسره وي او همدا وېره یې مخه نیسي.

۷. خلک بدلون کوي.

مثبت خلک په دې عقیده وي چې یوازېنی شی چې نه بدلېږي، بدلون دی. دوی باور لري چې هم دوی او هم نور خلک د بدلون کولو وړتیا لري. منفي ګرا اشخاص فکر کوي چې خلک چې څنګه دي، تل به همغسې وي. دوی د بهترېدو هڅه نه کوي، ځکه ذهن کې یې دغه باور ځای نېولی وي چې “څه ګټه به راکړي؟” سربېره پر دې، منفي خلک نور هم نه پرېږدي چې بدلون وکړي. یو ځل چې یو شخص سترګو ته په کوم نظر ورغی، دا بیا ډېره سخته وي چې په اړه یې خپل فکر بدل کړي.

۸. لا ډېر څه باید زده کړم.

مثبت خلک، له زدکړې سره مینه لري. دوی پوهېږي چې مالومات ورځ په ورځ پرمختیا مومي او څه چې ۱۰ کاله پخوا ګټور وو، اوس ښايي هومره په درد و نه خوري. منفي ګرا کسان فکر کوي چې دوی پر هر څه پوهېږي. د نويو او هغه شیانو زده کولو ته چندان لېوالتیا نه ښيي چې د دوی له باورونو سره په ټکر کې وي. دوی دې ته ډېر ګوري چې څوک په سمه دي، نه دې ته چې څه سم دي.

۹. راځئ لوی کار ته مخه کړو!

مثبت انسان، د لویو کارونو په تر لاسه کولو کې د وېرې احساس نه کوي او ډار نه لري. منفي فکر والا کس، نه یوازې چې پخپله وړوکی فکر لري بلکې هڅه کوي چې نورو ته هم فکر ورکړي چې ګواکې د دوی خوبونه او هیلې ډېرې زیاتې لوړې دي.

۱۰. “فلانی ډېر تکړه دی.

مثبت خلک، د نورو په نشتون کې د هغوی ستاینه او ملاتړ کوي. منفي اشخاص بیا بل کس ښکته راغورځوي او له دغه کار څخه خوند اخلي.

۱۱. زما تر ټولو سخت دښمن او تر ټولو ښه ملګری؛ زه پخپله یم.

مثبت فکره کسان، له خپل ځان سره اغېزناکه همغږي لري. دوی چې کله له ځان سره غږېږي، خپلو خبرو ته پوره متوجه وي او نه پرېږدي چې پخپل لاس ځان د بې زړتوب کندې ته ټېله کړي. سربېره پر دې، دوی خیالي توقعات نه کوي. دوی د نا توانۍ او د حالاتو د خرابېدو پر وخت خپل ځان ته دروغ نه وايي، بلکې هغه څه ور یادوي چې د بریالي کېدو لپاره یې باید تر سره کړي. منفي خلک، پخپله د ځان سخت دښمن وي. دوی هڅه کوي چې د هر شي، هغه اسان او د وتلو لوری وګوري. دوی منفي نکتو ته هم ډېر متوجه وي او پخپله، پر ځان باور کموي.

۱۲. زما چلن او کړه وړه څه پیغام لېږدوي؟

مثبت خلک، د اتلانو په څېر چلن کوي. دوی له نورو سره په ډېر ښه ډول ناسته ولاړه کوي او پر څېره یې د مثبت ګرایۍ نښې له ورایه ښکاري. منفي خلک، هر چېرته ځان ټيټ او کم حیثیته راولي. دوی سرونه ځوړند نېولي وي او ښکته ګوري. چې ور ودې کتل، فکر به وکړې چې پر خپل حال نه دي. خپه وي، غیرې عادي او داسې ښکاري لکه غم چې ور پېښ وي.

۱۳. لویې موخې په ډله ییزې همکارۍ سره خپلېږي.

 مثبت خلک، له نورو سره په یوه ټیم کې ګډه کار کوي او د هر چا نظر ته، حتی که ورسره موافق هم نه وي په درانه سترګه ګوري او ملاتړ یې کوي. منفي خلکو ته چې کومې مفکورې ناکامې په فکر ورشي، هېڅکله یې ملاتړ نه کوي. کله چې یې د یوه همکار/ملګري مفکوره بریالۍ نه شي نو هر وخت یې دا خبره له خولې را ووځي “نه وو مې درته ویلي (چې همداسې کېږي)؟!”.

۱۴. روښنایي کوم لورې ته ده؟

مثبت خلک، شکرګزار او منندوی وي. دوی په هر حالت کې مثبتو لورو ته ګوري او په دې باور نه وي چې هر څه باید هر وخت سم وي. منفي خلک، له سختیو د تېښتې لار ګوري. دوی په منډه وي او د حالاتو مثبت اړخ نه ویني.

۱۵. ډېر ښه مخ ته روان یې!

 مثبت خلک غواړي چې مثبت ګرایي خوره کړي. څوک چې په خپل کار کې ښه روان وي، دوی ورته ډېر متوجه وي او ژر یې د کار ستاینه کوي او لا یې هڅوي. منفي خلک بیا وایي “همدا یې کار دی، باید ویې کړي.” دوی نه پوهېږي چې د نورو هڅول، په دې مانا دي چې تاسې هغوی څارئ او تر نظر لاندې مو دي. د یو چا د کار ستاینه کول اړیکې غښتلې کوي او دوی لا ډېر هڅوي. مثبت خلک، د هڅوونکو نظرونو ځواک ته په کمه نه ګوري.

(Visited 13 times, 1 visits today)
Leave A Reply

Your email address will not be published.