The news is by your side.

ولسمشر غنی هم د راتلونکی نوماند ولسمشر په توګه نوم لیکنه وکړه

0

ولسمشر محمد اشرف غنی په راتلونکو ولسمشریزه ټاکنو کې د خپلو مرستیالانو په ګډون د نوماند په توګه په رسمی ډول نوم لیکنه وکړه.

ښاغلی غنی تر نوم لیکنې وروسته په خپلو خبرو کې و ویل، چې د ده په مشرۍ ټیم چې د دولت جوړونې ټیم نومېږی درې غړی لری، چې دوه یې مرستیالان او درېم کس به یې هم ځانګړی استازی وی.

هغه زیاته کړه، چې لومړی مرستیال د ملی امنیت پخوانی رییس امرالله صالح، دوهم مرستیال یې سروردانش او په ځانګړی استازی یې هم محمد یوسف غضنفر دی.

نوموړی د امرالله صالح په اړه وویل، چې هغه د امنیت په برخه کې یو مسلکی ځوان او د هېواد ملی او استراتېژکو ګټو ته ژمن کس دی.

دغه راز هغه د خپل دوهم مرستیال په اړه وویل، چې دانش د افغان حکومت د قوانینو د جوړونې په برخه کې یوه ملی پانګه وه او پانګه ده او په دې برخه کې حکومت ته ډېر کار کړی دی.

ولسمشر غنی وویل، چې دی او ټیم به یې د افغانستان د پرمختګ او په ځانګړې توګه د یوې باغزته سولې نه ستړې کېدونې هلې ځلې وکړی، خو په وینا یې دوی سوله له چا په ګدایۍ نه غواړی.

د ولسمشر په وینا افغانستان باید په راتلونکې کې باید داسې یو قوی او ځوان دولت ولری، چې وکولای شی، د هېواد ۴۰ کلن بحرانونه له منځه یوسی او په خبره یې که د ده ټیم په راتلونکو ټاکنو کې بریالی شی، د دې وړتیا لری، چې روان بحرانونه پای ته ورسوی.

ښاغلی غنی زیاته کړه، چې د افغانستان تر ټولو لوی قوم د افغانستان غریب پاړکی دی او دی او ټیم یې دې ته ژمن دی، چې له افغانستانه به نور د فقر او لوږې ټغر ټولوی.

ولسمشر غنی و ویل، چې د ټاکنو تر سره کېدو پورې به د هېواد د ولسمشر په توګه خپلې دندې ته ادامه ورکوی، او خپله زیاته پاملرنه به یې د حکومت کارونو ته وی، نه ټاکنیز کمپاین ته خو هیله یې څرګنده کړه، چې د ټاکنو کمېسیون وتوانېږی په یوه ورځ کې د ټاکنو پایلې اعلان کړی.

(Visited 31 times, 1 visits today)
Leave A Reply

Your email address will not be published.