The news is by your side.

ستا د سترګو ښکلې ژبه

نور محمد لاهو

0
ښکلو سترګو ته دې وایه
خپلې ژبې سره پام کړي
دلته ټولو مدرسو کې ستا د تکو تورو سترګو
سپينه ژبه تدریس کیږي
شین سلام دې د بڼو په تور ځنګله کې چیرته پټ کړه
ستا د سترګو الفبا ټولو حِفظ کړې
+ ++ +
د پخو انارو زړونه ډير نازک دي
ستا د مستې خندا کړس به یې په چاود کړي
په یاقوتو به دې سپينه لمن سره شي
او د مینې هریوسَت دې لکه سپین د شیدو قند
پریږده د شونډو په سره رنګ کې دې اوبه شي
+ + + +
نورله هغه ګل فروشه ګلان ماخله
هغه کور کې تاته پټه له ګلونو
جوړه کړې سره ډولۍ ده
هغه ټوله شپه په خوب کې
تاته سپین سپين کمیسونه
د سوسن له پاڼو اوبي
+ + ++
او په لاره له هرګامه سره پام کړه
باد ته و ایه چې دې پلونه
له پښودې رالویدلي دا سپیڅلي تصویرونه
ژر له خاورو نه راواخلي
په وزرو پورې یې سریښ کړي
ځکه دلته هر یو کس ته
اندازه ستا د پښو ده ورمعلومه
ستا د پله له جړو کرښو
دوی زما د کنډوالې پته لوستای شي
+ + +
سترګې وروغړوه ماته
د دې ځای خلک بلا دي
ستاد سترګود رپ غږهم اوریدای او هم په ګوتو رانیوی شي
+ + + +
په ګریوان باندې چې عطر کله شیندې
زما نوم ورته وانخلې
دلته هرې خوشبويی پورې
غوږونه ګڼډل شوي
ها د مستو خنداګانو شینکی کړَس دې
په پلو پورې کړه غوټه
ستا په دغې بې کلامه موسیقي اوس ټول پوهیږي
+ + + +
له سروشونډو دې شکرې کړه راټولې
زما بام نه دا کوترې کړه را ټولې
د بنګړیوماشوم شرنګ دې
په بوخڅه کې نور للو کړه
دغه شوخ شوخ معصومان
چیرته پرده کې درللو کړه
او د لوړې داریا درد دې
په چمبه کې درللو کړه
د دې ځای بینا خوپریږده نابینایې هم بلا دي
ستا د مستو شنو بنګړیو د موزیک محتوا ټوله
خپلو سترګو کې لوستی شي
+ + + +
له هرل یکه دې وګرځم
زه یې نه شمه لوستلی
زما ګوتو پورې شمعې ګڼدل شوي
په رڼا یې
ستاپه لاس ټولې لیکلې تنکۍ کرښې
د لیک منځ کې اوبه کیږي
+ + + +
سرې اوشنې او تکې تورې
جامې مه جوړه ځانته
د لونګو په فصلونو
لمبې مه بلوه ځانته
دغه ټول خلک خبردي
چې ته ماته په کوم رنګ کې
تر سپرلیه پیغله بریښې
+ + + +
مرغان پریده چې تکرار سندرې بولي
د خندا دا ښکلی ریتم دې نور مه پریږده کاپي کړي
+ + + +
په کوڅه کې مه ځلیږه
زه له کوره وتی نشم
زما پښو ته یې ډبرې وراغوستي
د کړکۍ په کولپ کبلې راشنې شوي
دا جهان ټول د تیارو کنګل کې سوزي
تا د ټول جهان رڼاوې اغوستلي
دا دې ډير فصلونه وشول
چې لمرهم
زما د کور د تت لاټین رڼا ته ناست دی
ـــــــــــــــــــــــــــ
کولپ : قفل
لاټین : الیکن ، چراغ
May be an image of flower and outdoors
Leave A Reply

Your email address will not be published.