The news is by your side.

ملا خاني

کاوون طوفاني

0 115
د آسمان اوښکې څڅيږي، هوا خړه باراني ده
تورې ورېځې شوې رابرې، سېلۍ توره توفاني ده
تکو سپينو واورو اېل کړې، د اوچتو غرونو څوکې
د يخني پاغوندې ووري، د ږلۍ حکمراني ده
د دې ښار وجود نيولی، د سپېڅلي جنون تبې
د دې ښار په ميخانو کې، اوس رواج ملا خاني ده
هره ورځ مسلخ ته لېږدي، سرې غوټۍ د آرمانونو
د خزان د خدای په پښو کې، د گلونو قرباني ده
بيا دوران د معجزو شو، اندېښنه د وږيو نشته
په بغارو يې ماړه کړل، دا د شيخ مهرباني ده
ضَرَبَ او ضَرَبُ شوه ، ترانه د ماشومانو
قالَ قالَ ملا قالَ سرچپه مسلماني ده
د رباب په اعدام ژاړي، سريندې په چيغو چيغو
په لوټ شوي نيستان کې، بيا سندره زنداني ده
زوړ زاهد خراباتي شو، بې نوبته پيالې اخلي
د انگورو پېغلې ناڅي، د هوس د لور ځواني ده
د بازار پر سرلوحه يې، د پاچا حُکم ليکلی :
د کچرو قيمت جگ شو، د آسونو ارزاني ده.
Leave A Reply

Your email address will not be published.