The news is by your side.

نیم کال

شفیقه خپلواک

0 390

‎پوره نیم کال شو له ځانه یم وتلې

‎پوره نیم کال شو چې غږ مې رانه ورک دی

‎پوره نیم کال شو نغمې مې ګنهګارې

‎پوره نیم کال شو خوږمن زړګی مې ‌‌‌‌‌‌ډک دی

‎پوره نیم کال شو چې بنده توتکۍ یم

‎وزر وټپوم تاو شم په قفس کې

‎مړو بڼکو ته مې وګورم حیرانه

‎نه مرګی وي، نه مې وي زندګي وس کې

‎پوره نیم کال شو په هېڅ هم نپوهېږم

‎نه د درد احساس شته، نه د کومې بایلې

‎نه پوښتنې، نه ځواب ته اندیښمنه

‎نه په لټه یمه زه د کومې پایلې

‎پوره نیم کال شو چې ورو، ورو تېږه کېږم

‎ان رڼې اوبه په څنګ رانه تېرېږي

‎پوره نیم کال شو چې ګرد یم او لوخړه

‎راڼه ستوري مې لمن کې نه ځلېږي

‎پوره نیم کال شو چې سترګې مې صحرا شوې

‎د یوه څاڅکي باران پکې قحطي ده

‎پوره نیم کال شو چوپتیا مې حجرې مړې کړې

‎او د څڼو نڅېدا مې دوزخي ده

‎پوره نیم کال شو چې هر سهار ویښېږم

‎لمر ته غېږ پرانېزم ګوندې بیا رڼه شم

‎پوره نیم کال شو چې وچې هیلې پالم

‎ګوندې بېرته، ګوندې بېرته زرغونه شم

Leave A Reply

Your email address will not be published.