بایسکل

کوچنی بایسکل، چې لا یې له میله پلاستیک را تاو و،  دوکان ته را د ننه کړ.
هټیوال له ستړي مشي وروسته، ترې وپوښتل:

د ده خو لا میاشت هم نه پوره کیږي، تا خو ویل  یواځنی زوی مې دی ، ښه او محکم شی راکړه او اوس یې بیرته خرڅوې؟

سړی غلی شو. سترګې یې همداسې پرانیستې پاتې وې. د بڼو څوکو یې د اوښکو غوټۍ وکړې.
ژوره ساه یې واخیسته:

پرون یې له شفاخانې رخصت او کور ته مې راووست، اوله پوښتنه یې د بایسکل وه؛ خو هغه اوس دوه ټایره نشي چلولی. د هغه دواړه پښې….
خبره ترې په چیغه بدله شوه او له دوکانه داسې په منډه ووت، لکه زوروره چاودنه چې وشي.

کیسه ګۍ

نعمان دوست
عقرب ۲۲/ ۱۳۹۹