The news is by your side.

د الله اکبر نارو په طالب د اندامونو لړزه راوستې

خوشال خلیل

0
طالبانو چې د لومړي ځل لپاره سر راپورته کړ، ولس د مجاهدینو له سګ جنګيو پزې ته راغلي و، نو هر ښار کې يې خلکو د الله اکبر په نارو هرکلی وکړ. هغه وخت د طالبانو روايت داسې و چې موږ قدرت نه غواړو، شر او فساد ورکوو او بېرته مدرسو ته ستنېږو. ددې تر څنګ دا روايت هم خوله په خوله کېده چې دا د ظاهرشاه لښکر دی چې يو ځل ټول افغانستان ونيسي پخوانی پاچا راولي او دوی بېرته جوماتونو ته ځي.
يو ښار به يې نيولی نه و، بل ښار به ورته هرکلی وايه، جلال اباد يې چې ونيو کابل ورته مخکې تر مخکې تسليم شو. هغه وخت کابل کې ټول دوه لکه انسانان نه اوسېدل، هغه کابليان پاتې و چې هيڅ يې نلرل، بېوزله، جنګ ځپلي، په تياره او غمونو کې ډوب ول.
اوس مياشت وشوه چې طالبان د هرات او کندهار ښار ځينو حوزو ته ننوتي، خو خلک د هرکلي په ځای ورنه تښتي او نور ورسره جنګېږي. هيڅوک هر کلی ورته نه وايي، برعکس يې په خلاف د الله اکبر ناري وهي.
دا هغه اميد بخښوونکې شېبې دي چې نړۍ يې حيرانه کړي او ټولو نړيوالو ته دا پيغام ورکوي که تاسې مات شوي ياست، خو افغان ملت ندی مات، دا ملت ژوندی دی او ډېر لوړ غږ لري چې نن يې د الله اکبر په نارو په طالب او د هغو د خواخوږو په اندامونو لړزه راوستې او د فتحې کاذب خيال او خوب يې ور تښتولی.
(Visited 14 times, 1 visits today)
Leave A Reply

Your email address will not be published.