The news is by your side.

د لتا منګشکر د جنازې مراسم مې ولیدل

نعمان دوست

0 152
د لتا منګشکر د جنازې مراسم مې ولیدل چې په څه شان او شوکت او ولسي مینه اجرا شول.
خپل بې بدیله هنرمند ارواښاد استاد اولمیر ( ۱۳۰۸-۱۳۶۱) را یاد شو.
مشهور هنرمند استاد اولمیر؛ چې تلپاتې ملي، حماسي او عشقي سندرې یې وویلې او د استادۍ تر مقامه ورسیده، د ژوند وروستۍ شیبې یې ډېرې دردونکې وې.
حتی ویل کیږي چې د ژوند په وروستیو شیبو کې به د کابل ښار د خیبر رسټورانټ مخې ته په دې تمه ناست و چې که د کوم سخي زړه پرې وسوزي او یوه مړۍ ډوډۍ ورکړي.
دې بې بدیله هنرمند ته حتی په هغه وطن کې د قبر ځای نه پیدا کیده چې ده یې په وصف کې بې شماره دلنشینه سندرې وویلې.
ویل کیږي چې یوه شاګرد یې په مایوسۍ جسد مخاطب کړ او ورته ویل یې:
استاده!
تا خو ویل: دا مې د بابا وطن، دا مې د دادا وطن…
اوس خو همدې وطن کې درته د قبر ځای نشته.
اولمیر، له نن څخه ۳۹ کاله وړاندې کابل کې وفات شو او په ډېر غربت او مایوسۍ یې له هغه وطنه سترګې پټې کړې چې ده ورته خپله سیمه ( پېښور، نوتیه) پرې ایښې وه.
هوښیار او نیکبخته ولسونه هغه دي چې پرته له ظالم، خاین او مفسده، هر انسان پکې قدر ولري.
اروا یې ښاده
Leave A Reply

Your email address will not be published.