The news is by your side.

جرګې سولې ته د ولسمشر ژمنتیا ثابته کړه

0

محمد روښان ښاد _

په دې کې شک نشته چې ولسمشر غني له لومړۍ ورځې سولې ته نه یوازې ژمن دی، بلکې سولې ته د رسېدو په برخه کې یې بېدرغه عملي هڅې کړي او د ده د دغو ارزښتناکو کوښښونو له برکته سوله اوسني پړاو ته را رسېدلې او تر بل هر وخت د افغان سولې د تامین لپاره فرصتونه او زمینې برابرې شوې دي.

ولسمشر غني د سیاسیونو په ګډون د بېلابېلو اقشارو سره د مشورتي ناستو ترڅنګ دا ځل د سولې په برخه کې یو بل مهم ګام هم واخیست. دغه مهم ګام د سولې مشورتي لویې جرګې جوړول و. په لومړیو کې په ملي او بین المللي کچه د دغې جرګې د جوړولو پراخ هرکلی وشو، خو کرار کرار یې د ولسمشر کرزي په شمول ځینو سیاسیونو نرم مخالفت پیل کړ.

دلیل یې دا وو چې دوی په لومړیو کې هیڅ باور نه درلود چې دغه جرګه دې په دغو حساسو شرایطو کې جوړه شي او یا دې ولسمشر غني د هغې په جوړېدو وتوانېږي، مګر کله چې دوی پوه شول چې جرګه حتمي جوړېدونکې ده، نو بیا یې خپل مخالفت په ډاګه کړ. دوی غوښتل چې له جرګې سره په پرېکړون هم جرګه کم رنګه وښیي او هم د خلکو اذهان مغشوش کړي، د همدې لپاره یې اوازې خپرې کړېو اعلامیې یې ورکړې او وې ویل، چې دا جرګه نه یوازې ګټوره نه ده، بلکې د وخت او پیسو بې وخته ضیاع ده.

ولس د دوی خبرو او څرګندونو ته ځکه ارزښت ورنه کړ چې ولس اوس هوښیار شوی دی او دوی دې نتیجې ته رسېدلي د افغانستان سیاسیون عموماً د هغوی مسایلو مخالفت کوي چې د ولس او وطن په خیر وي او د دوی شخصي ګټې له لاسه وتونکې وي، خو کله چې کیسه برعکس وي، یانې ولس په سختۍ کې وي او د دوی شخصي ګټې تامین وي، نو دوی بیا سخت خوشاله وي. کله چې ولس له جرګې سره د سیاسیونو مخالفت ولیده، نو دوی پوه شول چې دا جرګه حتماً د افغان ولس او وطن په ګټه ده او له همدې امله یې هم د جرګې پراخ ملاتړ وکړ او هم یې خپل منتخب استازي د سولې مشورتي لویې جرګې ته را واستول.

د سولې مشورتي لویې جرګې بریالي ترسره کېدو د سولې په برخه کې د ولسمشر غني ژمنتیا ولس ته لا نوره هم په ډاګه کړه او له همدې امله ټول ولس د ولسمشر غني د دغه دریځ، کوښښونو او هلو ځلو قدرداني وکړه او ولسمشر ته یې ډاډ ورکړ چې د سولې په هره هڅه او اقدام کې افغان ملت په غوڅ اکثریت د خپل ولسمشر او نظام ترڅنګ ولاړ دی او ټینګ ملاتړ یې کوي.

بل لورته د سولې مشورتي لویې جرګې بریالي ترسره کېدو د ولس پر وړاندې افغان سیاسیون خصوصاً هغوی چې له یادې جرګې سره یې خپل پرېکون او مخالفت په ډاګه کړی و، سخته پیکه شول او لا هم د ملامتۍ او خجالتۍ احساس کوي. ولس د دوی په شومو نیتونو لا ډېر پوه شول.    

(Visited 34 times, 1 visits today)

Leave A Reply

Your email address will not be published.